Prezantim libri “Pyetje Ramazani” nga Bashkim Aliu

Pyetje Ramazani, në fakt, është përmbledhje e disa pyetjeve, të cilat janë botuarmë parë në librat e mi pyetje dhe përgjigje dhe web portale në gjuhën shqipe. Këto pyetje janë parashtruar në kohë të ndryshme dhe janë botuar në vende të ndryshme. Për atë, me qëllim që dobia e këtyre pyetjeve enkas për Ramazanin dhe agjërimin të jetë më e madhe, vendosëm që t’i tubojmë dhe t’i botojmë në një libër.
Marrë parasyshë se pyetjet e përmbledhura kanë të bëjnë me Ramazanin dhe agjërimin, vendosëm që këtë përmbledhje ta titullojmë Pyetje Ramazani, ngase që të gjitha lidhen për këtë muaj të bekuar dhe agjërimin.
Është e vërtetë se në kohën e fundit, web portalet kanë marrë hov të madh, dhe realisht janë medium më i frekuentuar nga lexuesit. Në përgjithësi, interneti si shtëpi më e madhe e publikimeve elektronike, ka ecur shumë para dhe ua ka tejkaluar mediumeve tjera, megjithatë, unë besoj se libri e ka rolin e vet të pazëvendësueshëm dhe do të vazhdojë të jetë dëshmi më e madhe e kulturës dhe shkencës. Nisur nga kjo, si dhe nga kërkesa dhe këshilla e disa dashamirëve të librit që të mund t’i lexojnë pyetjet e Ramazanit, të cilat janë publikuar më herët në disa libra, dhe nuk gjinden as në web portale, vendosa që këto pyetje për Ramazanin, që disa prej tyre janë publikuar vetëm në disa web portale, t’i botojë në një libër, nisur nga bindja ime se librin e shkruar në letra, e jo vetëm në formë elektronike, edhe realisht edhe simbolikisht, nuk ka kush e zëvendëson.

Libri është botuar nga Forumi Rinor Islam.

E lus Allahu e Madhërishëm që këto pyetje dhe përgjigjet’i bëjë të dobishme për lexuesin. Nëse në këto përgjigje ia kam qëlluar, kjo është mirësi e Allahut, e nëse kam gabuar, kjo është lëshimi im si njeri dhe mashtrim i djallit. E lus Allahun që të më falë mua, ty lexues i nderuar, dhe gjithë besimtarët.

Amin