Përkitazi me obduksionin e kufomave

VENDIME TË SESIONIT TË DHJETË TË Akademisë së Fikhut Islam, pranë Ligës së Botës Islame,

I MBAJTUR PREJ DITËS SË SHTUNË24 SAFER, DERI NË DITËN E MËRKURË 28, SAFER1408H/  (17-21 TETOR 1987)

VENDIMI I PARË

PËRKITAZI ME OBDUKSIONIN E KUFOMAVE

Falënderimi i takon Allahut, përveç të Cilit nuk ka tjetër, bekimi dhe paqa qofshin mbi atë pas të cilit nuk ka pejgamber tjetër, zotëriun dhe pejgamberin tonëMuhammedin.

Këshilli i akademisë së Fikhut Islam, pranë Ligës së Botës Islame, në sesionin e tij të dhjetë të mbajtur në Mekke, prej prej ditës së Shtunë 24 Safer, deri në ditën e Diel 28 Safer të vitit 1408h, e që përputhet me  datën 17-21 Tetor të vitit 1987, e shqyrtoi çështjen e obduksionit të kufomave, dhe pas debatimit dhe këmbimit të mendimeve për çështjen në fjalë, e miratoi vendimin vijues:

Bazuar në domosdoshmëritë të cilat e imponojnë obduksionin e kufomave, e të cilat obduksionin e bëjnë një dobi e cila e randon dëmin e cenimit të dinjitetit të njeriut të vdekur, Këshilli i Akademisë së Fikhut pranë Ligës së Botës Islame, morri vendim si vijon:

I-Lejohet obduksioni i kufomave për qëllimet vijuese:

a)  Verifikimi i një kallëzimi penal të ngritur për krim, në mënyrë që të konstatohen shkaqet e vdekjes, apo të krimit të bërë. Kjo vlen për rastet kur gjykatësi e ka problem t’i konstatojë shkaqet e vdekjes, dhe bëhet e qartë se obduksioni është mënyra e vetme për konstatimin e shkaqeve të vdekjes.

b) Vërtetimi i sëmundjeve të cilat diktojnë obduksion, në mënyrë që në dritë të përfundimeve të obduksionit të merren masat preventive dhe barërat adekuate për shërimin e sëmundjeve të tilla.

c) Për ta përvetësuar dhe për t’ua mësuar tjerëve mjekësin, gjegjësisht për motive profesionale në fakultetet e medicinës.

II-Në rastin e obduksionit për motive profesionale në fushën e mjekësisë, duhet të merren parasyshë kushtet vijuese:

a)  Nëse është fjala për kufomën e një personi të njohur, është kusht që ai të ketë lejuar para vdekjes që kufoma e tij të bëhet obduksion, apo këtë ta lejojnë trashigimtarët pas vdekjes së tij. Obduksioni i njeriut mund të bëhet vetëm në rastet e domosdoshme.

b) Obduksioni duhet të kufizohet vetëm në masë sa është e domosdoshme, në mënyrë që kufomat mos të keqpërdoren.

c) Kufomat e femrave mund të bëhen obduskion vetëm nga mjeket femra, me përjashtim nëse nuk ka të tilla.

III-Në të gjitha rastet, është obligim që të varrosen të gjitha pjesët e kufomës të cilës i është bërë obduksion.

Bekimi i Allahut dhe paqa e përshëndetjet e shumta qofshin mbi zotëriun tonë Muhammedin, familjen dhe shokët e Tij.

Falënderimi i plotë i takon vetëm Allahut, Zotit të botëve.

Nënshkruar nga:

KRYETARI I KËSHILLIT TË AKADEMISË SË FIKHUT

Abdu-l-Aziz Abdullah ibën Baz

ZAVENDËSKRYETARI

Dr.Abdullah Omer Nesif.

SEKRETAR I KËSHILLIT TË AKADEMISË SË FIKHUT ISLAM

Dr.Talal Omer Ba Fekih.

Pasojnë  anëtarët tjerë:

Muhammed ibën Xhubejr, Abdullah Abdurrahman El-Bessam, Salih ibën Feuzan ibën Abdullah El-Feuzan (Nuk pajtohem me lejimin e obduksionit të kufomës së muslimanit për motive profesionale në medicinë. Kam kundërshtim të detajuar rreth kësaj.), Muhammed ibën Abdullah ibën Sebil (Përmbahem për obduksionin e kufomës së muslimanit në pikën C të rastit I.), Mustafa Ahmed Ez-Zerka, Muhammed Mahmud Es-Savaf, Muhammed Reshid Kabbani, Muhammed Esh-Shadhli, Ebu Bekër Mahmud Xhumi, Dr.Ahmed Fehmij Ebu Sunne, Muhammed El-Habib ibën El-Huxha, Dr.Bekër Ebu Zejd (E kundërshtoj dhe nuk pajtohem me lejimin e obduksionit të kufomës së muslimanit për t’u mësuar mjekët dhe për t’u vërtetuar sëmundjet.), Muhammed ibën Salim ibën Abdu-l-Vedud, Ebu-l-Hasen Ali El-Hasenij En-Nedvij.[1]

Prej arabishtes: Bashkim Aliu